Speech: diskurso di Minister Jose Jardim na okashon di inisio di desmantelashon di chimenea di planta di awa i koriente na Mundu

Geplaatst op 26 september 2016

Alleen beschikbaar in het Papiamentu.

Tur presente bon dia i un bon siman i bon bini di mi parti tambe na e momento históriko aki no solamente pa Aqualectra pero pa Kòrsou en general.

P’ami ta un plaser pa dirigí algun palabra na e okashon aki na tur presente.

E desaroyo nan na Aqualectra di último añanan ta mustra ku esfuersonan grandi a keda hasi dor di trahadó, gerensia, hunta di komisario, akshonista, gobièrnu i tur sobra institutonan liá ku Aqualectra pa awe nos por bisa ku Aqualectra ta serando un kapítulo di un forma di operá i ta habriendo un era nobo ku bista pa bira un kompañia di utilidat modelo den Karibe.

Pilarnan pa logra esaki ta e forma di traha nobo, e meks di produkshon nobo ku mas i mas penetrashon di energia alternativo (aki por bisa ku ya kaba a rekonosé ku Kòrsou su penetrashon di energia alternativo ta un di esnan mas haltu den Karibe), plannan avansá pa implementá un ret di meter inteligente kaminda e kliente mes tin su konsumo den su man, sistemanan atministrativo nobo i moderno i por último un edifisio nobo ku no solamente lo kumpli ku eksigensianan moderno, pero lo habri e posibilidat pa mas desaroyo ekonómiko aki na Mundu Nobo i tambe na Rif, kaminda awe e edifisio di Aqualectra ta ubiká.

Pa loke ta e parti históriko di e dia di awe mester bisa ku, for di hopi sitio na Kòrsou òf yegando Kòrsou den avion, e chimeneanan aki ta visibel. E aspekto estétiko aki lo evolushoná positivamente.

E konstrukshon di e chimeneanan tabata señal di desaroyo e tempu ei i nan desmantelashon awe tambe ta señal di desaroyo.

Si nos para ketu un ratu na e punto di desaroyo ekonómiko mi mester rekordá ku kaminda awe tin Renaissance hotèl i shopping mall no mas ku 15 aña pasa tabata tin un planta di e tempu ei KODELA. Despues di desmantelashon di e planta ei, i alabes ku inougurashon di e planta Dokweg I, a habri kaminda pa e desaroyo ekonómiko ku nos ta mira den e area ei. Meskos ta e ekspektativa pa e area di Mundu Nobo.

Awe nos ta para na un etapa paresido: ainougurá e planta di Dokweg II, i awe nos ta den e proseso pa kuminsa desmantela e punto di mas haltu di e planta di Mundu Nobo, kaminda despues lo tin amplio espasio pa desaroyo ekonómiko. Tur esaki ta puntonan di enfoke ku ta kontribuí pa e Aqualectra di futuro.

Loke mi no por keda sin menshoná ta e logro mas resien kaminda ku Aqualectra despues di a pasa un proseso di skrutinio dor di un kompania finansiero internashonal Standard & Poors a logra di haña su evaluashon finansiero (rating finansiero) kompará ku kompanianan den mesun sektor internashonal.

Ta bon rekorda ku no menos ku 4 aña pasa Aqualectra tabata un kompañia praktikamente den bankarota, i awor Aqualectra a wòrdu di rate ku un A- kual ta igual na e rating di pais Kòrsou. Esaki basa primeramente riba e echo ku Gobièrnu di Kòrsou a demostrá den pasado resien i tambe a indiká ku den futuro e ta respaldá Aqualectra.

Ta bon pa splika kiko e rating finansiero aki dor di Standard & Poors lo nifiká pa Aqualectra su futuro:
Na promé lugá e rating finansiero, ku nos por konsiderá un sorto di benchmark, ta duna un indikashon i bista riba futuro maneho finansiero di e kompania.
Na momento ku e maneho no ta koherente òf konsistente, esaki lo wòrdu indiká dor di Standard & Poors.
Na di dos lugá e logro aki ta pone Aqualectra den un posishon mas fuerte na momento ku e mester negoshá òf re-negoshá fiansanan den futuro. Ku un rating manera esun ku Aqualectra a haña, e posibilidat tei pa haña interes riba fiansa mas abou. Naturalmente esaki lo baha gastunan di Aqualectra ku lo kontribuí na e efisiensia di e kompania i redukshon di tarifanan.
Por último e rating finansiero lo brinda protekshon na e kompañia pa faktornan eksterno ku lo por influensia e estado finansiero negativamente. Na momento ku esaki sosodé, e rating lo reflehá esaki inmediatamente i lo ta bisto pa tur hende.

Mi ke felisitá gerensia, staf i personal di Aqualectra ku e logro aki, i tambe ku e inisio di e desmantelashon di e punto di mas haltu di e planta di Mundu Nobo i tur e otro logronan ku tabata tin den último tempu.

Masha danki